كل سنة و انت طيبة يا حبيبتى

اول بداية سنة لينا مع بعض ... :)
رغم انها مش اول بداية سنة لينا - فعلا - مع بعض, بس واضح انها مش هتكون سنة عادية ... مش عارف دى حاجة حلوة ولا وحشة ....

اكسل شييت ... شوكلاته جايباها اختك (بجد انا عاوز اعرف جبتيها منيين) ... وائل فى برنامج منى الشازلى ( يا واد يا جامد ;) ) ... اخدنا SPG 50 Nights award ... و عربيات بتولع على المحور ( وبرضوا الناس واقفة تتفرج) ...... من الاخر شكلها هتبقا سنة مش سهلة !

المهم ... انا بس كنت عاوز اقولك ' كل سنة و انت طيبة يا حبيبتى ' .. و يا رب يا رب تكون كل حياتنا  الجاية مع بعض كلها راحة و سعادة و هناء ....

سلام بقا دلوقتى عشان احنا قربنا خلاش من البيت :)

يوم زواجى منك

خلاص يا حبيبتى ... اهو جه اليوم  اليوم اللى استنايناه ... خلاص ... مش هنفترق تانى ابدا :)

اخيرا عرفت ازاى احبك

حبيبتى ... بعد كلامنا النهاردة عن (امبراطورية م ) مش عارف ليه فجأة كدة حسيت انى عرفت ازاى احبك!
ايوة انا فعلا بحبك .. بس عمر ما الكلام لوحدة كان كفاية ..
لازم احبك زى مانتى عايزة .. مش زى مانا عاوز

عرفت انى عشان احبك لازم افهمك ..
عشان احبك لازم اسمعك ...
عشان احبك لازم احضنك وانتى زعلانة ... اخفف عنك ... احميكى بصدرى من كل الدنيا ... اخبيكى جوايا لما الدنيا تضيق عليكى ...
عشان احبك لازم استحملك شوية صغيرة وانتى متضايقة زى ما استحملتينى كتييير وانا مجنون

عرفت انك نقصك تلاقى فيا الحنية و الخوف عليكى و الضهر اللى تتسندى عليه

عرفت ... و عرفت .... و عرفت
واللى عرفت اكتبوا كتبتوا ... و لسه فى جوايا كمان

يمكن ماكنش لسه بردوا عرفت اوى ... بس اوعدك انى مش هبطل محاولة ... ده انتى تستهالى عمرى كلوا احاول اسعدك بيه ... يا حبيبتى :(

لندن واللى بيحصل فى لندن !!

بجد انا تعبت من البلد ديه و انا لسه مابقليش فيها يومين ... مش كفاية انها تبعدنى عنك ...لا ... و كمان مش مخليانى مستريح حتى !!!
بجد، كده أوفر !!
لندن ... انتى مقبلتك ليا وحشه

لما بكون معاكى ...

بجد يا حبيبتى.
انا لما بكون معاكى بأرتاح ... بحس انى انت بيتى ... انت نفسك ... عينيكى, ابتسمتك, ملامحك, لمسه ايديكى ... كل ده بيحسسنى انى خلاص, لقيت بيتى و سكنى

ربنا يخليكى ليا دايما مكان راحتى و سكنى ... امين

انا خايف ...

مش عارف ليه ... او يمكن عارف و مش عاوز اعترف
بس خايف اصحا فى يوم و مالأكيش جنبى ... خايف اصحا فى يوم و الاقيكى حد تانى
يا أكرم الناس ....
حاسس انى مهما اترجيتك بردوا مش هتقعدى .. مش هتستنى ... عشان كده هسيبك براحتك
ايوة هسيبك ... متخفيش .. مقصدش هتخلى عنك ... ابدا ... دا انا اتخلى عن روحى ولا اتخلى عنك ... انا عيزك ترجعلى بنفسك ... انا مش همسك فيكى ... هسيبك تتكلمى مع نفسك ... عشان لما ترجعيلى تكونى فعلا رجعة بمزاجك مش عشان اى حاجة تانية

Our anniversary

كل سنة و انت طيبة يا أجمل و أروع صدفة فى الدنيا :)

صحيح كان المطعم مش اد كدة :$ ... بس انتى كنتى (و لسه على فكرة) وحشانى اوى ... وحشانى اوى !!

و أنتخبنا رئيس :)

لحظة جميلة أوى لما تحس انك عملت حاجة صح ... و نفعت :)
مصر انتخبت رئيسها ... و على الرغم من ان 50% تقريبا مكنوش عوزينوا ... الا ان الفرحة فى لاشوراع تحس انها طالعة من القلب بجد ... حاجة كدة تخليك تسال: لما كل الناس ديه فرحانه، اومال مين اللى انخب شفيق !!؟!؟!؟
كان نفسنا مرشح تانى اللى يكون كسبان ... بس فعلا، فرحتنا بخسارة شفيق اكبر بكتييييييييييييييييير :)

و تحيا مصر

اللى حصل النهاردة

عارفين النهاردة حصل ايه؟
حصل حاجة غريبة اوى؟
هى اللى بتحاول تصلحنى :D ....
شوفتوش حد معندوش دم زى كده ... طب قولوى و النبى ديه يتعمل معاها ايه ؟؟
الاجابة ببساطة .. ربنا يجزيك خير ... ماهو فعلا الانسان الاصيل مفيش غير ربنا اللى يوفيه حقه.
من غير تفصيل كتير ... اللى حصل انها رجعت تانى تملى الدنيا فرحا ... رجعت تانى تفرح و تفرحنى معاها ... هى ما كنتش زعلانه، لا ... هيا بس كانت تعبانه اليومين اللى فاتوا ... و شوف الدنيا، اللى تحب تفرحوا معاها يكون انا ...!!!
للاسف مكنتش قادر افرح ... و للاسف كنت انا السبب فى انى انزلها من فرحتها الكبيرة ديه عشان مكنتش قادر اطلعلها
تقوم هى ايه؟ ايه؟ ... تقوم هى تنزلى :) ... شوفتوش صياد يا خلق بنقذوا طيرو !!

قولتهالك من اول يوم .. و هاقولها تانى ... انت نعمة كبيرة، ربنا يقدرنى و اصونها !!

عاوز اكتب كل حاجة حلوة بتعملها!

أيوة ... عشان فى الايام اللى زى كدة اقراها
صحيح الاحساس و الانطباع اللى بيفضل بعد كل موقف هو المهم ... بس الموقف نفسه بيكون مهم عشان العقل يقتنع و سيتوعب ... و عشان انا طبعا ذاكرتى قوية جدا فانا بحتاج انى اكتب كل حاجة عشان افتكرها ...

لما بتزعلى منى 2

تعرفى ايه اكتر حاجة بتضيقنى لما بنبقى زعلنين ؟ ... انى مبعرفش اسمعك كويس ... صوت نفسى بيبقى عالى اوى مش بيخلينى اسمع حاجة تانية ...

لما بتزعلى منى

اكيد اى حد مبيحبش يزعل اللى بيحبه ... بيحاول يعمل اللى يفرحه و يسعده و يرضيه ... الدنيا بتحط فى طريقنا مشاكل تختبرنا بيها ... انا دلوقتى حاسس انى فى اختبار ... اللى فعلا مدايقنى مش انى اتحطيت فى الاختبار ده, لا ... اللى مديقنى انى بتعامل على انى السبب فيه ... كان نفسى اكون معاكى فى مشوار النهاردة ...

مش متعود اكتب انا ... بس انا كمان مش عاوز انسى احساسى النهاردة ... حاسس انى فاضى ... بجد فى ناس كتيير حواليا بس انا لوحدى ...

مش عاوز انسى النهاردة ;عشان اى كان اللى هيحل بعد النهارده اكيد هتعلم منه ..

You just make me feel wonderful :)

Having someone who is able to attract good incidents, is really a great blessing. Specially, if this one is really close to you.
You really bring out the best in me, and sometimes the worst :S ... yet, in all times, I feel safe when I realize that this is happening with "You"!
Today, you gave me a great push forward. To work, to love, to LIVE.
What I want to share with all the world now is, being around such great great people makes it easier to pass through hard times, and enjoy good times to the fullest :D !!